Plan directiv da la vschinauncha da Segl
Ils credos seguaints servan scu basa per la planisaziun e l’agir da tuot las persunas e dittas da Segl. Els dessan furmer la basa per l’agir strategic e faun, scu annex da la ledscha da fabrica, part a la ledscha cumünela. Ils credos sun impegnativs per las autoriteds. Las instanzas turisticas e politicas e la populaziun da Segl formuleschan, comunicheschan e promouvan ils credos cumünaivelmaing.
Constataziuns
Il lö d’abiter, da vacanzas e da lavur Segl spordscha in ün ambiaint privilegio culturel e da la cuntredgia pussibilteds optimelas per ün’economia turistica unica e d’ota qualited.
Inclus in quista dess esser la populaziun indigena, la misteraunza, las societeds e’l giast.
Credos
Nus ans ingaschains sainza cumpromiss pel mantegnimaint, per la protecziun e per la chüra da la natüra e da la cuntredgia.
Nus vulains mantgnair il purtret da la vschinauncha a reguard substanza dals fabricats e da l’infrastructura. Impü cuntinuains culla planisaziun locala in möd restrictiv e retardo.
Nus vulains promouver e sustgnair l’hotelleria existenta. Il svilup da construcziun d’abitaziuns da vacanzas e da seguonda proprieted dess gnir restret.
Nus pigliains imsüras per calmer il trafic.
La marca «Segl/Sils i.E.» es pusiziuneda in möd cler e’s sviluppa cun egna individualited, uschè ch’ella vain remarcheda cleramaing i’l marcho turistic.
Relaziuns partenarias vers l’extern in möd da sinergias sun in mira.
Cul sustegn d’ün turissem dad ota qualited cun giasts individuels e giasts regulers amegldrains la creaziun da valur. Eir cull’ animaziun da la stagiun bassa da sted e d’inviern.
Nus cultivains e promovins la spüerta da sport, da la cultura e dal temp liber.
Ad es da render consciant a la populaziun cha’l turissem es basa da vita. Tuot las abitantas e tuot ils abitants faun part a «l’intrapraisa Segl».
Nus promovins il stedi da furmaziun da tuot las persunas chi lavuran a Segl e sviluppains spüertas da quel gener. Il mantegnimaint da la lingua e da la cultura rumauntscha ans sto fich a cour.
Per optimer la qualited da vita amegldrainsa l’infrastructura. Üna spüerta pü vasta dad abitaziuns attractivas per indigens ed impiegos stu gnir promovida.
Nus vivains üna politica d’infurmaziun transparenta ed avierta sün tuot ils s-chelins.
Dispusiziuns
Üna gruppa da lavur chi’s cumpuona da persunas da tuot gener elavurescha ün catalog cun dispusiziuns chi sforza da realiser ils credos. Il catalog da dispusiziuns vain controllo minch’an da la gruppa da lavur aunz l’elavuraziun dal preventiv cumünel. Tenor bsögn vain il catalog adatto.
Apruvo da la radunanza cumünela dals 9 december 2004.